Truri është organi që vepron si qendra e kontrollit të trupit tonë. Ai është përgjegjës për shqisat, perceptimin dhe mendimin, koordinimin e lëvizjeve dhe funksionimin e organeve si zemra dhe mushkëritë.
Funksionimi i mirë dhe shëndeti i trurit janë të lidhura drejtpërdrejt me dietën tonë. Ka lëndë ushqyese dhe ushqime specifike që përmirësojnë kujtesën dhe përqendrimin dhe kontribuojnë ndjeshëm në performancën më të mirë gjatë provimeve dhe rritjen e kërkesave mendore.
Çfarë lëndësh ushqyese duhet të vendosim në dietën tonë për një mendje të shëndetshme?
Acidet yndyrore omega-3: Ato kanë efekte të vërtetuara anti-inflamatore dhe anti-trombotike, të cilat nxisin shëndetin e trurit dhe përmirësojnë kujtesën dhe përqendrimin. Peshqit yndyrorë si salmoni, skumbri, sardelet, frutat e detit, farat e lirit dhe arrat janë të pasur me acide yndyrore omega-3.
Përbërësit antioksidues: Reduktojnë veprimin e radikaleve të lira dhe mbrojnë kundër stresit oksidativ dhe inflamacionit. Ushqime si manaferrat, luleshtrydhet,rrushi, shafrani i Indisë dhe perime të ndryshme si speca, karota, kajsi, kivi etj. janë shumë të pasura me vitamina dhe antioksidantë. Për këtë, ne sigurohemi që të konsumojmë të paktën 5 porcione me fruta dhe perime shumëngjyrëshe të stinës çdo ditë.
Vitamina B12: Është e lidhur me funksionimin e mirë të sistemit nervor qendror dhe trurit. Marrja e duhur parandalon shumë çrregullime të sistemit nervor qendror. E gjejmë në ushqime si mishi, vezët, qumështi, peshku.
Acidi folik: Përmirëson funksionin e trurit dhe zvogëlon rrezikun e çrregullimeve neurologjike si çmenduria dhe depresioni. Perimet me gjethe jeshile, agrumet dhe bishtajoret janë ushqime shumë të pasura me folate.
Glukoza: Është burimi kryesor i energjisë për trurin dhe duket se përmirëson kujtesën afatshkurtër, përqendrimin dhe funksionin njohës. Për këtë është e rëndësishme të kemi në dietën tonë ushqime, si ushqime me niseshte (bukë, oriz, makarona), fruta dhe lëngje të tyre.
Hekuri: Ndihmon transportin e oksigjenit në qeliza dhe kontribuon në oksigjenimin më të mirë të trurit. Marrja adekuate zvogëlon simptomat e lodhjes dhe letargjisë. E gjejmë te mishi i kuq, pula, peshku dhe prodhimet e detit, por edhe te ushqimet bimore si bishtajoret, quinoa dhe arrat.
Kakao: Mund të rrisë aftësinë për t’u përqëndruar dhe për t’u kushtuar vëmendje, për të përmirësuar kujtesën dhe për të ruajtur funksionet njohëse.
Kafeina: Rrit përqendrimin dhe vigjilencën, redukton lodhjen dhe mund të përmirësojë gjendjen shpirtërore.
